Quico Cadaval: "Estamos nun momento no que todo é farsa"

O Teatro Principal encheuse para recibir a estrea mundial de O Porco de Pé. A adaptación que a compañía Producións Excéntricas fixo da novela de Vicente Risco, a petición da Fundación que leva o nome do escritor, continúa agora xira por toda Galicia. Quico Cadaval pasou polos micrófonos de La Ventana de Ourense para falar deste proxecto. O ribeirán considera "que o teatro influíu moito na política. Atribúese aos políticos as cualidades boas para representar un papel e estamos nun momento en que todo é farsa, que non é só disfrazar, tamén contén violencia e na vida pública hai moita violencia".

Risco escribiu O porco de pé en 1928, unha sátira que ten por protagonista a Don Celidonio, que "ascendeu de porco a marrán e chegou a ser alcalde". Un papel que na produción de Excéntricas é interpretado por Víctor Mosqueira. No elenco tamén Patricia Vázquez e Evaristo Calvo, que interpretan diferentes papeis. A música é de Piti Sanz. Carlos Alonso na plástica, na iluminación Octavio Mas. Cadaval reafírmase no obxectivo de Excéntricas: "dedicarse á máis nobre función do teatro que é entreter".

A Fundación Risco propuxo a realización da novela de Risco a nivel teatral. A súa presidenta Celia Pereira recoñece que "levábamos tempo tratando de que alguén se enganchara con ese proxecto". Un proxecto que tivo a súa primeira representación perante escolares de Ourense.