Así se prepara o “cocido” nas illas de Cabo Verde: a cachupa
Hai unha versión “rica” e outra “pobre”, dependendo da variedade de carnes que inclúa
Así se prepara o “cocido” nas illas de Cabo Verde: a cachupa
El código iframe se ha copiado en el portapapeles
Lugo
Ineida Moreno cando prepara cachupa en Burela lémbrase da cociña de súa nai e de súa avoa en Cabo Verde, que foron as que lle ensinaron a preparar este plato típico da súa gastronomía tradicional. Do recetario galego gústalle o cocido, precisamente porque se parece moito: "A cachupa é parecida, pero con millo en lugar de garbanzos".
"Non é unha comida que se prepare a diario", explica, porque leva tempo, pero cada vez que a fai "é unha alegría porque estás todo o día satisfeito". O ingrediente base é o millo en gran, e leva ademais carne que pode ser, "dependendo do gusto de cada un", de tenreira, de porco ou polo. Tamén pode levar chourizo e incluso pescado. "Para o que non coma carne pode facerse só coas verdudas e está bo igual", engade Ineida.
Dependendo da variedade de carnes que inclúa en Cabo Verde distínguese entre "cachupa pobre" se leva os ingredientes básicos, que son "carne de porco e millo", ou "cahupa rica", que a que leva "moita diversidade de carnes". Preparala leva tempo, pero non é demasiado complexo, segundo explica: "O primeiro que hai que facer é poñer nunha pota auga e o millo, cunha folla de loureiro, un dente de allo e unha cebola". Ten que ferver "bastante tempo", e cando comece a estar cociñado engádese a faba, que necesita menos cocción.
Mentres tanto, noutra pota imos preparando a carne. "O que fago é que mentres tanto adobo a carne e fago un refogado". Cando están listas as dúas preparacións mestúranse e engádese a verdura: "Pode ser cabaza, cenoria, calabacín ou o que lle guste a cada un". Así llo explicou Ineida aos asistentes ao taller de gastronomía caboverdiana que impartiu en Burela, organizado pola Asociación Cultural Xebra, que foron polo segundo prato e que aprenderon, ademais, a preparar cuscuz.
Taller de gastronomía caboverdiana organizado pola asociación Xebra en Burela.
Taller de gastronomía caboverdiana organizado pola asociación Xebra en Burela.
De postre, cuscuz
O postre ideal para despois de comer cachupa é o cuscuz. "É unha especie de biscoito preparado con fariña de millo principalmente e cocido ao baño maría", explica Ineida. Para preparalo hai que poñer auga na mariña ata que esté húmida, "non mollada", advirte. Hai que poñer tamén azucre e pódese engadir tamén puré de batata, aínda que é opcional. Unha vez feita a masa a cocción faise a baño maría, así que a textura que resulta é exponxosa. O toque final, desvela a cociñeira, é acompañalo de marmelada, manteca ou crema de cacao, aínda que tamen se pode comer seco.
