O BNG levará ao Parlamento a proposta de recoñecer a Castelao de maneira oficial e legal como primeiro presidente de Galicia
Ana Pontón dixo que o BNG celebrar a figura do rianxeiro “sen deturpacións nin manipulacións”
O BNG deu comenzo os actos do Ano Castelao en Pontevedra coa portavoz nacional, Ana Pontón, anunciando que a formación nacionalista vai levar ao Parlamento unha iniciativa para que Castelao sexa declarado de maneira oficial o primeiro presidente de Galicia, rememorando así que, desde o exilio, deseñou e presidiu o Consello de Galicia hai 80 anos. Deixou claro Pontón que trátase de rescatar a memoria democrática, facer xustiza e recoñecer que o primeiro presidente de Galicia, por dereito propio, foi Alfonso Daniel Rodríguez Castelao desde o exilio. Ana Pontón dixo que isto debería estudarse nos libros de historia.
O BNG quere celebrar a súa figura “sen deturpacións nin manipulacións”, indicou Pontón, tendo en conta que “Galiza precisa máis Castelao que nunca” porque segundo o BNG, o galego está en mínimos históricos tras quince anos de políticas do PP que calificou como lingüicidas.
Dixo Pontón que: “precisamos máis Castelao porque temos que seguir defendendo Galiza fronte un centralismo voraz e letal; porque queremos políticas sociais igualitarias, sen exclusións, porque defendemos que o dereito á vivenda se cumpra e o dereito ao traballo sexa unha realidade. Todo isto está na persoa que máis loitou por situar Galiza no lugar que merecía, sen complexos e sen pedir permiso, con esa fe no noso pobo que herdamos con orgullo e honestidade”, destacou a líder do Bloque.
O acto que tivo lugar esta mañá en Pontevedra contou coa presenza dos e das representantes do BNG en todos os concellos da comarca.
