A fin de semana arranca de xeito tráxico na bisbarra
Un accidente laboral en Laxe e un de tráfico en Carnota deixan dúas vítimas mortais
Costa da Morte
Venres negro na Costa da Morte. Sendos accidentes mortais deixaron dous falecidos como balance provisional da fin de semana. En Laxe perdía a vida o encargado do mantemento das instalacións eléctricas municipais. En Lira, concello de Carnota, un accidente de tráfico cobrouse a vida unha varón e deixou ferida a unha menor de idade e a outro xoven.
En Laxe a consternación era evidente a media mañán. Nunha manobra aparentemente sinxela de cambio dunha bombilla nunha luminaria, falecía electrocutado José Mariño Mato, de 60 anos e responsable de Instalacións Eléctricas Mariño. A mediodía, tanto el como un operario da súa empresa procedían a cambiar unha bombilla do alumeado público cando recibíu dúas descargas que lle produciron a morte de xeito instantáneo. O seu corpo foi trasladado ao Instituto de Medicina Legal para que se lle efectuase a autopsia e será mañán domingo cando sexa soterrado en Cesullas, Cabana, lugar onde residía.
En Lira os feitos tiveron lugar a primeira hora da tarde, cando colidiron un Volkswagen Golf GTI que circulaba pola AC-550 e un Citroën Saxo que se incorporaba á vía. O impacto frontolateral tivo lugar no porta do condutor do Citroën, falecendo este prácticamente no acto. O Citroën Saxo quedou envorcado ao pé dunha vivenda, sendo necesarios os traballos do bombeiros do parque de Cee para excarcelar a unha menor de idade, neta do falecido, que precisou ser trasladada en helicóptero. O condutor do Volkswagen Golf tamén precisou asistencia sanitaria inda que por feridas menores. A Garda Civil de Tráfico xa iniciou a investigación e as primeiras hipóteses céntranse na alta velocidade á que circularía o Volkswagen pola AC-550 e a falta de dilixencia debida do Citroën ao incorporarse á vía. O falecido é Rogelio Saborido Lago, un construtor xubilado que ten participado en varias iniciativas sociais na parroquia.
