O TSXG confirma a inhabilitación por oito anos e medio a José Luís Fondo

Ponteceso

A Sala do Civil e Penal do Tribunal Superior de Xustiza de Galicia (TSXG) confirmou a sentenza da Audiencia Provincial da Coruña que condenou ao que foi alcalde de Ponteceso entre 1993 e 2015, o popular José Luis Fondo, por cometer un delito continuado de prevaricación administrativa.

O alto tribunal galego desestimou o recurso de apelación interposto polo procesado contra o fallo de primeira instancia que o inhabilitou para emprego ou cargo público e, en particular, relacionado coa función de alcalde, durante oito anos e medio.

Na súa sentenza, a Audiencia Provincial considerou probado que durante o seu mandato, en particular entre os anos 2012 e 2015, o Concello de Ponteceso "víase obrigado de maneira permanente a axustar a súa dotación orzamentaria tendo en conta que, aínda cando algún exercicio lanzaba resultado positivo, era frecuente xerar numerosas obrigacións co consecuente prexuízo para as arcas municipais ao carecer de crédito axeitado, dispoñible e en contía suficiente".

Segundo se recolle na resolución, a execución de determinadas obras adxudicouse "co coñecemento e consentimento do acusado, na súa condición de alcalde, a unha empresa, incumprindo a normativa de contratación, ao prescindir total e absolutamente de procedemento algún a tal fin e sendo coñecedores da súa ilegalidade, ante os repetidos reparos feitos pola interventora municipal". A Audiencia sinalou que non consta acreditada a existencia de sobrecustos nesas facturas.

"Non é que se incumprira o procedemento, é que non existiu, por iso é inocuo soster que na sentenza non se diga que tramites se omitiron porque non existiu ningún con adecuada consideración procedemental, tendo en conta que as decisións sen reflexo no correspondente expediente non teñen aquela valoración", subliña o TSXG na resolución.

Únete al canal de WhatsApp de la SER

Ademais, sobre a proba da existencia dos expedientes administrativos, sinala que "os informes técnicos non determinan a súa existencia".

O TSXG reitera que "o determinante" é "a falta de expediente administrativo na contratación, e non tanto a realidade das providencias nas que se acorda a fiscalización da obrigación da administración".

No seu momento, a Audiencia absolveu a outro procesado por estes feitos, o responsable da empresa adxudicataria.