O enterro do Kiko de Nigrán terá lugar finalmente o vindeiro sábado 2 de marzo
A saída da comitiva fúnebre terá lugar ás 18h00 dende a Casa Consistorial, dirixíndose ao Torreiro de Parada
O Concello de Nigrán traslada finalmente o seu tradicional enterro do Kiko, que estaba orixinalmente previsto para o pasado domingo, ao sábado 2 de marzo, por mor das inclemencias meteorolóxicas que están a azoutar á comarca do Val Miñor nestas xornadas.
A comitiva fúnebre sairá ás 18h00 dende o Auditorio Municipal, cara o Torreiro de Parada, para ser velado nunha cerimonia fúnebre oficiada polo pregoeiro Antonio, quen divertirá coas súas coplas elaboradas cada ano ex-profeso.
Despois terá lugar a procesión polo barrio da Igrexa e a queima. Esta peculiar celebración naceu en Parada da man do Centro Cultural e Recreativo Parada do Miñor como alternativa ao típico ‘Enterro da Sardiña’, xa que a parroquia non ten mar pero si presume de múltiples galiñeiros con "kikos" (ata o punto de que esta ave representa á entidade).
Ao longo dunha década de vida foi adquirindo sona na localidade e, o que comezou como unha festa entre veciños, é hoxe en día un evento distintivo do entroido nigranés ao incluír o Concello hai oito anos a saída da comitiva desde o Auditorio Municipal e co kiko tirado por un carro de bois (nesta edición os bois non poderán estar).
