Ana Pontón: "Quero ser unha presidenta aliada de Vigo e dos seus sectores económicos

Vigo

En Hoy por Hoy Vigo falamos coa candidata á Xunta do Bloque Nacionalista Galego. Ana Pontón definiunos a súa folla de ruta e expúxonos algunhas das súas propostas programáticas en sanidade (Plan para Atención Primaria), educación (rebaixa de ratios e libros de texto de balde) ou en vivenda (axudas ao alugueiro e adquisición pola Xunta de vivenda baleira). A candidata nacionalista á Xunta deixou claro que quere abrir unha nova etapa de colaboración con Vigo e non de enfrontamento. Pontón argumentou que Vigo non foi ben tratada pola Xunta de Rueda e que ela si quere ser aliada da cidade; por exemplo apoiando aos sectores estratéxicos ou sacando do caixón a Lei de Área metropolitana. A candidata do BNG aposta por un Centro de Reparacións do Naval, por seguir potenciando Stellantis e por defender en Madrid ou Bruxelas a nosa pesca. Deixou claro tamén que se é presidenta terá como prioridade a liña Vigo-Porto, o Corredor Atlántico de Mercadorías e a creación dunha liña de cercanías. Con Ana Pontón charlamos en Televigo e Radio Vigo.