Premio á excelencia turística para a Festa da Filloa de Muimenta

Lugo

Ana e Dosinda aprenderon a facer filloas cando tiñan once anos, na casa, e agora contan xa máis de cinco décadas de experiencia. Son dúas das filloeiras que a principios do mes de maio fan miles delas na festa de exaltación deste prato en Muimenta. O último ano fixeron máis de vinte mil, e esta mañá na Praza de San Marcos fixeron unha pequena demostración para celebrar que a Deputación de Lugo, a través do Consello Provincial de Turismo, recoñece as súas máis de tres décadas de traxectoria. Os veciños que puideron probalas aseguran que eo premio é ben merecido.

Daniel Pollán é o presidente da comisión que organiza a cita e sinala que están todos "moi contentos e orgullosos porque é o recoñecemento ao traballo de moitas mulleres e homes, porque tamén hai filloeiros, que manteñen unha tradición de hai moitos anos". En total son en torno a 60 persoas as que participan nunha festa que se organiza con meses de antelación, e para a que hai relevo xeracional: "moitos dos que participaban xa non están, pero tamén hai moita xente nova que quere aprender a facelas e bota unha man o día da festa", di Dosinda.

O segredo dunha boa filloa

As dúas irmás aseguran que non ten ninguna complicación, máis que a práctica. Para facer a masa só fan falta fariña, leite, ovos e agua, e ten que estar máis bien líquida. "Estas son saladas e levan un pouco sal na masa", apuntan, e hai que untar a sartén cun cacho de touciño mollado un en aceite de oliva antes de verter o amoado. "Se é só con aceite tamén serve, pero no saen igual", sentencia Dosinda. A clave, desvelan, está en que quede ben estendida para que saian finas, e quitaras cando empecen a dourarse.