Unha confusión debido á marea baixa, a causa máis probable da varada de 13 golfiños en Balarés

Ponteceso

Na mañá do domingo 13 golfiños vararon na praia de Balarés en Ponteceso. Segundo o responsable do CEMMA Alfredo López non se sabe con certeza a causa desa varada, o máis probable é que foxe debido a unha confusión debido á marea baixa. Afortunadamente, nesta ocasión, tódolos golfiños volveron ao mar axudados polas persoas que estaban na Praia nese momento. O mesmo ocorreu con outro golfiño que varo una praia de Laxe. Non pasou o mesmo no ano 1997 cando morreran 6 dos 25 golfiños que vararan na Praia de Langosteira en Fisterra.

López explicounos que estes animais están todo o ano nas nosas rías, aínda que teñamos a sensación de que nos visitan máis no verán debido a que pasamos máis tempo nas praias e preto da costa.

O responsable do CEMMA falou tamén das interaccións das candorcas con barcos. Segundo López, en xeral, non están detectando un número maior destas interaccións que en anos anteriores, o que está sucedendo é que este verán a maioría delas están tendo lugar fronte a Costa da Morte, cando en outras ocasións ocorrían no Estreiro. Calculan dende o CEMMA que son unhas 14 as candorcas que se están comportando deste xeito e que a maioría das interaccións teñen lugar con veleiros de 11 a 17 metros.

Polo momento segue sen coñecerse exactamente a causa deste comportamento por parte das candorcas, Alfredo López recorda que non se trata de ataques agresivos senon de xogos amigables, algo que demostra o vídeo gravado recentemente na nosa zona no que pode verse interactuando a candorcas e golfiños cunha embarcación. “Se as candorcas tivesen unha actitude agresiva os primeiros en marchar serían os golfiños”.