O Porriño recupera o seu sitio no ciclismo nacional
O Gran Premio Concello do Porriño que terá lugar o vindeiro domingo 6 de xuño
Presentación Premio Concello do Porriño / Concello de O Porriño
Vigo
Coa participación de 150 corredores dos mellores equipos ciclistas das categorías elite e sub-23 tanto de Galicia como do resto do Estado, O Porriño vai recuperar sitio no ciclismo nacional coa celebración do Gran Premio Concello do Porriño que terá lugar o vindeiro domingo 6 de xuño. O concelleiro de Deportes, David Alonso reivindicou que "grazas ao traballo de moita xente o apoio das institucións, O Porriño disfrutará de novo do mellor ciclismo"
A proba, organizada polo club local "Master da Louriña" co apoio do Concello e da Deputación Provincial, será puntuable para a Copa de España de clubs e ao mesmo tempo a última cita antes do Campionato de España. Por esta razón o seleccionador galego da categoría sub 23, Xacobo Ucha subliñou "a importancia que vai ter o resultado na convocatoria que realizará para os ciclistas que sexan seleccionados para representar a Galicia no Campionato de España"
O percorrido do Gran Premio Concello do Porriño será moi atractivo e ao tempo moi recoñecible para os aficionados locais; con tres subidas (San Cosme e Abelenda por dúas veces) e un total de 140 quilómetros con saída e chegada na Avenida Domingo Bueno.
Tamén asistiu a presentación Gorka Gómez, deputado provincial delegado de Deportes que eloxiou o traballo do club organizador e do Concello no apoio do deporte e celebrou que "a recuperación de eventos deportivos é unha boa nova para axudar na reactivación polo que supoñen en turismo e polo tanto en movemento económico".
