Ourense sede do Campionato de Europa de Seleccións de Hockey Sala Feminino

Ourense

A Federación Europea de Hockey ven de anunciar a designación das sedes dos Campionatos de Europa de Hockey Sala 2022, recibindo a federación Galega a mellor das noticias: a designación de Ourense como sede do Campionato de Europa de Seleccións Femininas, a celebrar do 21 ao 23 de xaneiro de 2022.

Non por esperada deixa de ser relevante a designación do Pazo dos Deportes como sede deste evento de máximo nivel, que traerá á cidade ás seleccións de Bélxica, Croacia, Irlanda, Lituania, Polonia, Escocia, Suíza e por suposto España como anfitrioa.

Esta candidatura foi presentada pola Federación Galega de Hockey dentro da súa planificación 2020-2022 en colaboración coa Deputación Provincial de Ourense e o apoio da Real Federación Española de Hockey. A proposta do Pazo dos Deportes como instalación de máximo nivel foi unha das claves da designación, así como o arraigamento do hockey sala na cidade.

Previamente, o Pazo dos Deportes albergará en febreiro do 2021 a Fase do Campionato de España masculino de clubs, magnifica oportunidade para demostrar e afinar as capacidades organizativas de fronte ao compromiso Europeo.