Mobilización en Vigo polas Letras Galegas
Queremos Galego convoca unha manifestación que sairá do cruzamento de Vía Norte con Urzaiz ás 12 horas do venres 17 de maio
Cadena SER
Vigo
O Día das Letras Galegas será unha xornada de reivindicación tamén en Vigo cunha marcha para esixir “liberdade, igualdade e xustiza para o galego” co lema “máis que nunca queremos galego” e que sairá ás doce do mediodía de Vía Norte con Urzaiz.
Esta marcha está convocada pola plataforma cidadá Queremos Galego composta por máis de 700 entidades que queren apuntar que “ o 22,7% dos nenos de 4 a 15 anos non saben falar galego; porque existen límites de todo tipo, tamén legais, para empregalo con normalidade; porque o goberno galego non só non exerce o seu deber estatutario de defender a lingua, senón que actúa en contra, en ámbitos decisivos como a educación, a sanidade, a xustiza ou os medios de comunicación; e porque hai unha nova ofensiva xudicial e política contra o galego como a recente sentenza do Tribunal Supremo contra a ordenanza de normalización lingüística do Concello de Lugo". Así o explicaba nos micrófonos de Radio Vigo a vicepresidenta da Mesa pola Normalización e coordinadora en Vigo Elsa Quintas.
Cúmprense además dez anos da manifestación que congregou a 100.000 persoas tras a súa pancarta. Foi no 2009 en Compostela e foi a maior movilización a favor dunha lingua en Europa.
