Manuel María, protagonista do Día das Letras Galegas

Santiago de Compostela

"O poeta nacional", un "xigante" das letras, o iniciador da chamada Escola da Tebra... Manuel María (Outeiro de Rei, 1929 - A Coruña, 2004) foi o elixido para protagonizar o Día das Letras Galegas de 2016, o ano no que se conmemora o centenario das Irmandades da Fala.

"Manuel María encaixa perfectamente dentro do espírito, da acción, da letra e a música das Irmandades". Así o dixo o presidente da RAG, Xesús Alonso Montero, ao anunciar cal fora o designado entre os tres autores finalistas (os outros dous eran Xela Arias e o eterno aspirante, Carvalho Calero), unha decisión "difícil", tomada por maioría, que deixa á Academia "especialmente satisfeita, alegre e entusiasmada".

Tras a polémica deste ano en torno á figura de Filgueira Valverde, Manuel María aparece como unha aposta segura. Alonso Montero agarda que a súa elección traspase os muros da Academia -como sucedera con Vidal Bolaño ou Lois Pereiro- e sexa "un triunfo para a normalización". Non en van, o autor de Muiñeiro de brétemas ou Terra Cha é "un dos poetas máis cantados da literatura galega, quizais non tanto como Rosalía de Castro, pero si ao nivel de Curros Enríquez ou Celso Emilio Ferreiro".

O Concello da Coruña, a Mesa pola Normalización Lingüística ou a Deputación de Lugo xa amosaron a súa satisfacción pola elección de Manuel María.