Voltan as pantasmas

Lugo

Na cidade amurallada non se pode estar tranquilo. Parece que non lle senta ben ao Lugo xogar á hora da comida. Foron dous partidos disputados ás dúas do mediodía nos que o conxunto albivermello non foi quen de sacar ningún punto.

Cero de seis diante de Alavés e Vilarreal B. Dous equipos que demostraron ter moitísima máis pegada que o conxunto lucense. Segue a ser evidente que Hernán Pérez necesita un dianteiro centro que marque goles. Non pode depender da reconversión de Chris Ramos, que, por certo, segue sendo o mellor do equipo. O andaluz anotou os últimos catro goles lucenses, pero por desgraza, a expulsión do último partido non lle permitirá estar dispoñible esta fin de semana.

No Anxo Carro, o Alavés remontou un partido no que o Lugo deu a cara de principio a fin ante un dos cocos da categoría. Son encontros que se poden perder. Na última xornada, diante do filial do Vilarreal, había que dar un golpe sobre a mesa que non se deu. O talento do mini submarino amarelo e os fallos nas áreas condenaron a un CD Lugo que non deixou a imaxe pobre dos primeiros partidos de liga. Porén, deixaron os puntos, que é o máis importante.

Hai que seguir confiando, pero a xeira debe cambiar, polo ben de Hernán. As pantasmas están de volta e hai que escorrentalas. O Real Oviedo será un partido chave para o futuro lucense.